En Santiago e Láncara

Estas semanas foron intensas. Estivemos en Santiago e Láncara participando en sendos eventos maker.

Por vez primeira en Galicia realizouse unha mini-maker faire, en Santiago de Compostela. Alí estivemos ollando os avances do mundo asociativo e comercial. Por problemas loxísticos tiñemos que pospoñer a realización da demo do proxecto MWS (ferramenta de asistencia na sonorización de concertos), pero sí participamos na mesa de espazos makers. O noso compañeiro Andrés Maneiro estivo representando a Makers.Lugo na mesa debate conxuntamente con Bricolabs (Coruña), Recuncho maker (Santiago de Compostela) e AlgaLab (Vigo). A primeira boa nova da mesa foi enterarnos que hai un incipiente movemento maker en Pontevedra e que se están a consolidar como asociación!

Días máis tarde, participamos na xornada Eu amo fedellar, organizada pola rede revolta (rede de grupos de investigación universitarios ó redor da agroecoloxía), xunto a otros colectivos como ESF Galicia, Montenoso e a Asociación Galega de Amigos da Maquinaria Agrícola Clásica e o Colexio Alcalde Xosé Pichel. Nesta xuntanza estiveron presentes os nosos compañeiros Suso Toural e Raúl Chamorro. Suso presentou as súas experiencias relativas a traballo con arduino e tractores. As conversas que tivemos ó longo de toda a xornada foron moi prometedoras e saímos coa sensación de que hai unha base interesante para que agrome unha comunidade de traballo ó redor da maquinaría agrícola de código aberto.

En un par de semanas remataremos esta xira de Outono coa nosa presencia na senlleira OSHWDEM, o sábado 7 de Novembro. Entón será momento de pensar en todo o que aprendemos estas semanas e retomar os proxectos que temos entre mans cun novo pulo!